PRINTZIPIO KOOPERATIBOAK
SARITZERA GOAZ
2026 “KOOPERATUZ” SARIA PRINTZIPIO KOOPERATIBOEI
Erakunde emailea
BDS Eraldaketa Fabrika Elkartea, Ekonomia Soziala eta tokiko garapena sustatzeko elkartea.
Zenbatekoa
3.000 euro, 1.500 euroko bi saritan banatua.
Helburua
“Kooperatuz” sariaren helburua da Ekonomia Sozialaren balioak eta printzipio kooperatiboak gizarteratzea, ikusgarri egitea eta horien inguruko hausnarketa kolektiboa sustatzea, parte-hartze erraz eta irisgarri baten bidez.
Lehiaketak elkarlana, parte-hartzea, komunitatea, zaintza, justizia soziala eta lurraldearekiko konpromisoa bezalako balioak aitortu nahi ditu, ezagutza teknikorik edo forma juridikorik eskatu gabe.
Nor aurkeztu ahal da?
Lehiaketa herritar guztiei irekia dago. Aurkeztu ahal izango dira:
- Norbanakoak
- Gazteak (banaka edo taldean)
- Talde informalak (ikasle-taldeak, lagun-taldeak…)
- Elkarteak, kolektiboak edo komunitate-ekimenak
- Ekonomia Sozialeko enpresak edo kooperatibak
Ez da beharrezkoa kooperatiba izatea, ezta Ekonomia Sozialari buruzko aurretiazko ezagutza izatea ere.
Aurkeztu daitezkeen formatuak
Parte-hartzea kontakizun baten bidez egingo da, formatu librean, aukera hauetako batean:
- Testua
- Kontakizun laburra, testigantza edo hausnarketa
- Gehienez: orrialde 1 (~5.000 karaktere)
- Ikus-entzunezkoa
- Bideo laburra edo audioa
- Gehienez: 3 minutu
- Mugikorrarekin grabatua izan daiteke
- Irudia + testu laburra
- Argazkia, marrazkia, collagea edo irudi sinbolikoa: 3 irudi gehienez
- Azalpena: 5–6 lerro gehienez
Parte-hartzaile bakoitzak lan bakarra aurkeztu ahal izango du.
Zer baloratuko da?
Lan guztiek balorazio-irizpide berak izango dituzte, formatua edozein dela ere.
Bai baloratuko da:
- Ekonomia Sozialaren balioen presentzia
- Mezuaren argitasuna eta koherentzia
- Ikuspegi komunitarioa edo soziala
- Jatorrizkotasuna eta begirada propioa
Ez da baloratuko:
- Kalitate teknikoa
- Maila profesionala
- Terminologia espezializatua edo ezagutza teorikoa
Kategoriak eta sariak
Deialdi honetan bi kategoria ezartzen dira, adinaren arabera:
- Gazteen kategoria (17 urtera arte)
- 1.500 €-ko saria
- Helduen kategoria (18 urtetik gora)
- 1.500 €-ko saria
Kategoria bakoitzean sari bana emango da, baldintza beretan baloratuta.
Aurkezteko modua
Parte-hartzea online inprimaki baten bidez egingo da, BDSKoop-en webgunean eskuragarri egongo dena.
- Ez da ziurtagiririk edo saioa hasteko beharrik
- Ez da bestelako dokumentaziorik eskatuko
- Lanaren fitxategia edo testua zuzenean igoko da
Zazpi printzipio kooperatibo klasikoak hartuko dira kontutan ekimenak baloratzeko orduan:
1. Sarrera librea eta borondatezkoa.
Kooperatibak borondatezko erakundeak dira, beren zerbitzuak erabiltzeko gaitasuna duten pertsona guztiei irekiak eta bazkide izatearen erantzukizunak onartzeko prest daudenak, sexua, arraza, egoera soziala, politikoa edo erlijiosoa dela-eta bereizkeriarik egin gabe.
2. Kudeaketa demokratikoa
Kooperatibak bazkideek demokratikoki kudeatzen dituzten erakundeak dira, eta aktiboki parte hartzen dute beren politikak finkatzen eta erabakiak hartzen. Kooperatibak ordezkatu eta kudeatzeko hautatutako gizon eta emakumeak besteen aurrean dira erantzuleak. Lehen mailako kooperatibetan botoen berdintasuna erabiltzen da (pertsona bat, boto bat). Beste maila batzuetako kooperatibak ere modu demokratikoan antolatzen dira.
3. Parte hartze ekonomikoa
Bazkideek bidezko ekarpena egiten diote beren kooperatiben kapitalari, eta demokratikoki kudeatzen dute (sozietatearen ondarearen zati bat, gutxienez, kooperatibaren jabetza komuna da).
4. Autonomia eta independentzia
Kooperatibak autolaguntzako erakunde autonomoak dira, bazkideek kudeatuak. Beste erakunde batzuekin akordioak sinatzen badituzte, gobernuekin barne, edo kanpoko beste iturri batzuetatik kapitala lortzen badute, bazkideen kontrol demokratikoa ziurtatzeko eta kooperatiba-autonomiari eusteko moduan sinatzen dute.
5. Hezkuntza, informazioa eta prestakuntza
Kooperatibek heziketa eta informazioa ematen diete bazkideei, hautatutako ordezkariei, zuzendaritzako karguei eta kooperatibak eraginkortasunez garatzen lagun dezaketen langileei. Publikoari, batez ere gazteei eta iritzi-liderrei, kooperatibaren izaeraren eta onuren berri ematen diete.
6. Komunitatearekiko interesa
Kooperatibek beren komunitateen garapen jasangarria lortzeko lan egiten dute, beren gizarte-sareak onartutako politiken bidez.
7. Kooperatiben arteko lankidetza
Kooperatibek bazkideei ahalik eta modu eraginkorrenean laguntzen diete, eta kooperatiba-mugimendua indartzen dute, tokiko, nazioko, eskualdeko eta nazioarteko egituren bidez.
Epeak
- Deialdiaren irekiera: 2026ko otsailaren 20a
- Lanek aurkezteko azken eguna: 2026ko apirilaren 20a, 23:59
Epaimahaia
Balorazioa BDSKoop Elkarteak osatutako epaimahaiak egingo du, Ekonomia Sozialaren eta balio kooperatiboen ikuspegitik (Olatukoop, Hazikoop eta EHU-GEZKI-ko kideez osatua).
Aurreko edizioetako epaimahaikideekin harremana mantenduko da, eta gonbidatu gisa sari banaketa ekitaldira etortzeko aukera izango dute.